Мугалидер жана окуучулар жөнүндө тартылган дорама дүйнө жүзүн дүрбөлөңгө салды

Биздин өлкөдө корей дорамаларын сүйүп көргөн көрөрмандар оголе көп. Алардын катарында сиз дагы барсызбы?.. Акылга салып ойлонтчу, тарбиялык мааниси зор, азыркы коомдун көйгөйүн ачык көрсөткөн мыкты дораманы издеп жатсаңыз, анда бул чыгарма сөзсүз түрдө сиздин тизмеңизде болууга тийиш.

Zobolo — Азыркы учурда түштүк кореялык сериалдар дүйнө жүзүн багындырып жаткан чагы. Романтикалык же фантастикалык сюжеттерге көнүп калган көрөрмандарга «Чыныгы билим берүү» (Истинное образование) дорамасы таптакыр башка форматтагы ачылыш болду. Бул жөн гана мектеп жашоосу тууралуу жеңил-желпи окуя эмес, агартуу тармагындагы адилетсиздикти, мугалимдер менен окуучулардын кордук көргөнүн жана алардын келечеги үчүн болгон күрөшүн ачык-айкын чагылдырган терең тарбиялык маанидеги сериал.

Эмне үчүн бул дорама интернет айдыңында кызуу талкуу жаратып, ар бир ата-эне жана жаштар көрүүгө тийиш болгон чыгармага айланды?

Сериалдын ар бир бөлүгүндө корей мектептериндеги катаал реалдуулук сүрөттөлөт. Мыйзамдардын өзгөрүшү менен мугалимдердин колу байланып, класс ичиндеги тартипсиздик, зомбулук, окуучулардын баңгизаттарды колдонушу жана мугалимдерди урматтабай калышы күнүмдүк кадимки көрүнүшкө айланып калганы көрсөтүлөт.

Дал ушундай оор кезеңде Билим берүү министрлигинин колдоосу менен мектепке өз эрежелери менен келген атайын инспектор пайда болот. Анын максаты — жөн гана сабак өтүү эмес, система тарабынан корголбогон мугалимдердин укугун калыбына келтирүү, тарбиясыздыкка чек коюу жана ар бир окуучуга чыныгы билим менен тарбия эмне экенин түшүндүрүү.

Бул дораманы көрүү үчүн 3 негизги себеп:

1. Курч социалдык көйгөйлөр: Авторлор коомдогу жаап-жашырууга аракет кылынган мектеп буллингин, мугалимдердин психологиялык басым астында калышын жана ата-энелердин жоопкерчиликсиздигин тартынбай ачыкка чыгарышкан;

2. Динамикалуу жана сезимди козгогон сюжет: Ар бир бөлүм көңүлдү буруп, каармандар менен бирге тынчсызданууга мажбурлайт. Акыйкаттык үчүн күрөш жүрөктөгү адилеттүүлүк сезимин ойготот;

3. Терең философиялык маани: Авторлор билим алуу жөн гана баа топтоо же университетке өтүү эмес, биринчи кезекте адамгерчиликтүү инсанды тарбиялоо экенин каармандардын харизмасы жана алардын башынан өткөн окуялары аркылуу абдан таасирдүү жеткире алышкан.

Көрүүчүлөрдүн пикири

Соцтармактарда бул дорама тууралуу пикирлер экиге бөлүнсө да, көбү анын актуалдуулугун баса белгилешүүдө. Көптөгөн көрүүчүлөр: «Эгер мугалим өзүн коргой албаса, анда ал жерде кандай билим берүү жөнүндө сөз болушу мүмкүн?» — деген олуттуу суроону кабыргасынан коюп жатышат. Дорама дал ушундай оор суроолорго жооп издеп, ар бирибизди терең ойлонууга мажбурлайт.

Булак: Zobolo масс-медиасы