Ачыла электигине карабай ээси алмашты: «Кылым Банктын» акциялары кимге кетти?

Zobolo — «Кылым Банк» ачык акционердик коомунун 100% акциясы Кыргыз Республикасынын Финансы министрлигинен Президенттин иш башкармалыгынын карамагына өттү. Баалуу кагаздардын ээлеринин реестриндеги бул өзгөртүү 2026-жылдын 27-октябрында Кыргыз фондулук биржасында катталганын маалымат кызматы кабарлады.

Буга чейин Финансы министрлиги банктын 1 миллион жөнөкөй аталма акциясына ээлик кылып, бул уставдык капиталдын 100 пайызын түзгөн. Аталган пакеттин наркы 1 миллиард сомду түзчү.

Президент Садыр Жапаров 2026-жылдын август айында банктын акционери функцияларын Финансы министрлигинен Президенттин иш башкармалыгына өткөрүп берүү боюнча жарлыкка кол койгон.

Эске салсак, «Кылым Банк» 2025-жылдын январь айында мамлекеттин 100% катышуусу менен жана 1 миллиард сом баштапкы уставдык капитал менен түзүлгөн. Ал эми 2026-жылдын май айында банк улуттук жана чет өлкө валюталарында операцияларды жүргүзүү үчүн банктык лицензия алган. Пландарга ылайык, 2027-жылга карата акционердик коомдун уставдык капиталы 5 миллиард сомго чейин көбөйтүлүшү керек.

Булак: Zobolo масс-медиасы