Көп жылдан бери бүтпөгөн үйлөр: Эреже бузган курулуш компанияларына катуу чара көрүлөт

Zobolo — Курулуш министрлиги курулуш мөөнөтүн негизсиз создуктуруп же иштерди толугу менен токтотуп койгон курулуш компанияларына карата тышкы башкаруу киргизилерин кабарлады.

Ведомствонун маалыматы боюнча, курулуштардын токтоп калышына компаниялардын каржылык көйгөйлөрү, үлүшчүлөр алдындагы милдеттенмелерин аткарбаганы жана мыйзам бузуулар себеп болууда.

Министрликтин чечимине ылайык, төмөнкү көйгөйлүү объекттер жана компаниялар тышкы башкарууга кабылышы мүмкүн:

• Жибек Жолу көчөсү, 295, 297 — 80 батирлүү үй. Куруучу компания: «Эксперт строй». 2018-жылдан бери токтоп турат;

• Мичурин көчөсү, 121Б — 169 батирлүү үй. Куруучулар: «Эксперт строй» жана «Гидротехстрой». 2021-жылы токтогон;

• Көк-Жар жилмассиви, Куйручук көчөсү, 197/2 — 200 батирлүү үй. Куруучулар: «Эмаком» жана «Ханстрой». 2022-жылдан бери токтоп турат;

• Көк-Жар жилмассиви, Молдокулов көчөсү — 360 батирлүү турак жай комплекси. Куруучулар: «Кыргыз-Арабиан Альхнейзи» жана «ОППС строй». 2013-жылдан бери бүтпөй келет;

• Таш-Дөбө айылы, Куттубаев көчөсү, 15/9а, 15/9б, 15/10 — 10 кабаттуу үйлөр. Куруучулар: «Эмаком», «Ханстрой» жана «Бренд хаус». 2020-жылдан бери токтоп турат.

Бул чаралар үлүшчүлөрдүн укугун коргоого жана токтоп калган имараттарды бүткөрүүгө багытталган.

Булак: Zobolo масс-медиасы