Диплому жок психологдор жана көзү ачыктар айыпка жыгылабы? Парламентте жаңы демилге көтөрүлдү

Zobolo — Кыргызстанда кесиптик билими жок психологиялык кызмат көрсөткөндөргө жана көзү ачыктык (оккульттук кызмат) кылгандарга айып пул салуу каралууда. Тиешелүү мыйзам долбоорун Жогорку Кеңештин депутаттары Марлен Маматалиев, Гүлшаркан Култаева жана Болот Сагынаев демилгелешти.

Документке ылайык, мындай кызматтарды социалдык тармактарда, анын ичинде ар кандай блогерлер аркылуу жарнамалоого жана жайылтууга катуу тыюу салуу күчөтүлөт.

Эгер мыйзам бузулса, төмөнкүдөй айып пулдар каралган:

• Биринчи жолку эреже бузуу үчүн жеке жактарга 10 миң сом;

• Эгер бир жыл ичинде мыйзам бузуу кайталанса — 20 миң сом өлчөмүндө айып салынат.

Демилгечилердин айтымында, буга чейин оккульттук кызматтардын жарнамасына гана тыюу салынганы менен, алардын ишин толук токтотуу мүмкүн болбой келген. Ал эми мыйзамсыз ишмердүүлүк менен алектенгендерди алдамчылык беренеси боюнча жоопко тартуу үчүн жарандардын алданганын жана материалдык чыгым тартканын далилдөө чоң кыйынчылыктарды жаратууда.

Булак: Zobolo масс-медиасы