Жетишип калыңыз! Акысы бир нече миң долларды түзгөн кымбат анализдер Кыргызстанда акысыз жасалууда

Zobolo — Кыргызстанда 12 жугуштуу ооруга каршы иммунитетти аныктоо боюнча масштабдуу медициналык изилдөө жүрүп жатат. Бул тууралуу Улуттук коомдук саламаттык сактоо институтунун вирустук инфекцияларды көзөмөлдөө борборунун жетекчиси Зуридин Нурматов билдирди.

Аталган долбоор Россиянын Роспотребнадзоруна караштуу Санкт-Петербургдагы Эпидемиология жана микробиология илим-изилдөө институту менен биргеликте ишке ашырылууда.

Изилдөөнүн негизги маалыматтары:

• Кайсы оорулар текшерилет? Дифтерия, көк жөтөл, кызамык, суу чечек, В гепатити, кене энцефалити, бруцеллез жана башка, жалпысынан 12 инфекция.

• Кимдер катыша алат? Каалоочулар акысыз текшерүүдөн өтүп, кан тапшыруу аркылуу аталган илдеттерге каршы иммунитетинин деңгээлин биле алышат. Чет өлкөлөрдө мындай анализдердин баасы бир нече миң долларды түзсө, Кыргызстанда толугу менен акысыз жасалат.

• Пункттардын саны: Өлкө боюнча жалпы 67 текшерүү пункту ачылган. Анын 15и Бишкекте, экөө Ош шаарында, калган аймактарда райондор боюнча бирден пункт уюштурулган.

• Кантип катышууга болот? Атайын шилтеме аркылуу онлайн катталып, кан тапшырууга ыңгайлуу убакыт менен жайды тандоо зарыл. Каттоодон өткөндөн кийин катышуучуга жеке ID-код берилет.

• Маанилүү шарт: Аймактар жана жаш курактык топтор боюнча катышуучулардын саны чектелген, ал эми биоматериалдарды чогултуу иштери бир жуманын ичинде жыйынтыкталышы пландалууда.

Булак: Zobolo масс-медиасы