Кыргызстандын курамасы дүйнө аренасында кайсы орундарды багынтты?

Zobolo — 24-октябрдан 1-ноябрга чейин Казакстандын борбору Астана шаарында спорттук күрөш боюнча дүйнө чемпионаты өттү. Бул тууралуу Дене тарбия жана спорт агенттиги билдирди.

Кесүүчү таймаштар грек-рим, эркин жана кыз-келиндер күрөшү боюнча уюштурулуп, анда Кыргыз Республикасынын намысын 22 спортчу коргоду. Чоң чыңалуу коштогон мелдестин жыйынтыгында улуттук курама командабыз эки күмүш жана үч коло медаль жеңип алды.

Жеке көрсөткүчтөр боюнча төмөнкү спортчулар медаль тагынышты:

• Грек-рим күрөшү: Акжол Махмудов (82 кг чейин) жана Амантур Исмаилов (72 кг чейин) — коло медаль;

• Кыз-келиндер күрөшү: Мээрим Жуманазарова (68 кг чейин) — күмүш медаль;

• Эркин күрөш: Эрназар Акматалиев (70 кг чейин) — күмүш медаль, ал эми Малик Шаваев (86 кг чейин) — коло медаль.

Командалык эсепте кыргызстандыктар татыктуу орундарды ээледи: грек-рим күрөшү боюнча 14-орун, кыз-келиндер күрөшү боюнча 10-орун жана эркин күрөш боюнча 6-орун. Муну менен балбандарыбыз өлкө намысын эл аралык аренада дагы бир жолу бийик деңгээлде коргой алды.

Булак: Zobolo масс-медиасы