Ли Джэ Хундун күнөөсү эмнеде? Ал тартылган дорама жаңжалдан улам жылдырылды

Zobolo — Түштүк кореялык актёр Ли Джэ Хун тартылган долбоорлордун биринин премьерасы кайрадан кесиптешинин айланасындагы чырдан улам жылдырылды. SBS телеканалы актриса Ха Ёнго байланыштуу жаңжалдан улам «Жеңишке мүмкүнчүлүк бар» дорамасынын көрсөтүлүшү белгисиз мөөнөткө жылдырылганын расмий тастыктады.

Ли Джэ Хун менен Ха Ён башкы ролдорду аткарган комедиялык детектив жанрындагы дорама келерки жылдын биринчи жарымында экранга чыгышы керек болчу. Долбоордун тартуу иштери толугу менен аяктаган. Бирок 19-октябрда SBS телеканалы дораманы көрсөтүү программасынан алып салган. Каналдын маалыматына ылайык, учурда долбоордун жаратуучулары ылайыктуу чечим издеп жатышат, бирок премьеранын так датасы азырынча белгисиз.

Чыр Ха Ён «Үйдөгү көйгөйлүү бала» аттуу телеберүүгө катышкандан кийин башталган. Актриса төрт муундан бери дарыгерлер чыккан үй-бүлөдөн экенин айтып, чоң атасынын атасы Ханяндагы батыш медицинасынын алгачкы адиси болгонун жана император Коджонду дарылаганын билдирген.

Көп өтпөй көрүүчүлөр сөз болуп жаткан адам 1916-жылы түзүлгөн жапончул уюмдун тизмесинде аты аталган Ан Сан Хо экенин аныкташкан. Башында актрисанын агенттиги бул маалыматтарды четке каккан. Кийинчерээк Ха Ён өлкөсүнүн татаал тарыхына жеңил ойлуу мамиле кылганы үчүн кол жазма түрүндө кечирим сураган катын жарыялаган.

Бул жаңжалдын фонунда актриса Netflix платформасындагы «Травматология борбору» сериалынын курамынан да чыгып кеткен.

Ли Джэ Хун үчүн бул катарынан экинчи жолу болуп жаткан ушундай жагдай. Буга байланыштуу маалымат каражаттарында актёрдун карьерасындагы аргасыз тыныгуу тууралуу сөздөр айтыла баштады.

Өткөн жылы актёр көптөн күткөн «Сигнал» дорамасынын экинчи сезонундагы тартуу иштерин аяктаган. Долбоор tvN телеканалынын 20 жылдыгына карата быйыл көрсөтүлүшү керек болчу. Бирок актёр Чо Джин Ундун өспүрүм кезиндеги кылмыштуу өткөнү тууралуу маалыматтар ачыкка чыккандан кийин премьерасы токтотулган.

Натыйжада Чо Джин Ун актёрдук карьерасын аяктаганын жарыялаган. Ал эми «Сигнал 2» дорамасынын келечеги азыркыга чейин белгисиз бойдон калууда.

Интернет колдонуучулар Ли Джэ Хунга боор ооруп, актёр бир нече ай бою оор тартуу иштерине убакыт коротконуна карабастан, өз эмгегинин жыйынтыгын көрүүчүлөргө көрсөтүү мүмкүнчүлүгүн кайра-кайра жоготуп жатканын белгилешүүдө.

Булак: Zobolo масс-медиасы