КМШ өлкөлөрүнө талап коюлду: чек арадагы жүк ташуу тездетилип, чыгымдар азайтылышы керек

Zobolo — Кыргызстан КМШ өлкөлөрүн чек арадан товар өткөрүүнү тездетүүгө жана транспорттук чыгымдарды кыскартууга чакырды. Бул тууралуу министрлер кабинетинин төрагасынын биринчи орун басары Данияр Амангелдиев Душанбеде өтүп жаткан КМШ өкмөт башчыларынын саммитинде билдирди.

Анын айтымында, жүк ташууну жеңилдетүү үчүн электрондук документтерди колдонуу, жүк тууралуу маалыматты алдын ала берүү жана заманбап бажы технологияларын биргелешип киргизүү зарыл.

Ошондой эле Амангелдиев инвестициялык кызматташтыкка токтолуп, Кыргызстан биргелешкен долбоорлорду ишке ашырууга даяр экенин белгиледи. Анын айтымында, «Тамчы» атайын финансы-инвестициялык аймагы мындай демилгелерге кошумча мүмкүнчүлүктөрдү түзө алат.

Мындан тышкары, Кыргызстан КМШ жаштарынын катышуусунда Чыңгыз Айтматовдун 100 жылдыгына даярдыкты алдын ала баштоону көздөп жатат.

Булак: Zobolo масс-медиасы