Жогорку Кеңеш толугу менен санарипке өттү: эми «нейроюрист» иштелип жатат

Zobolo — Бүгүн, 20-октябрда Бишкекте Түрк мамлекеттеринин Парламенттик ассамблеясынын (ТүркПА) XV пленардык жыйыны өтүүдө. Бул тууралуу Жогорку Кеңештин басма сөз кызматы билдирди.

Жыйынга Жогорку Кеңештин төрагасы Марлен Маматалиев баштаган түрк мамлекеттеринин парламент жетекчилери жана эл аралык уюмдардын өкүлдөрү катышууда. Иш-чаранын негизги темасы — жасалма интеллект доорундагы парламенттер аралык кызматташтык.

Марлен Маматалиевдин айтымында, Кыргызстан парламенти толугу менен санариптик иш форматына өтүп, кагаз документтердин ордуна электрондук документ жүгүртүү колдонулууда. Ошондой эле парламенттин ишмердүүлүгү тууралуу маалыматтарды даярдоодо виртуалдык алып баруучулар пайдаланылып жатат.

Мындан тышкары, заманбап коомдук кабылдама ачылып, мыйзамдарды талдоочу «нейроюрист» тутуму иштелип чыгууда.

Жыйындын алкагында ТүркПАга мүчө мамлекеттердин ортосунда тажрыйба алмашуу, моделдик мыйзамдардын электрондук реестрин түзүү жана алардын аткарылышына жыл сайын талдоо жүргүзүү сунушталды.

Булак: Zobolo масс-медиасы