Кыргызстандын экономикасы дүйнөлүк каржы күн тартибинде

Zobolo — КР Улуттук банкынын Эл аралык валюта фондундагы (ЭВФ) КР атынан башкаруучу статусундагы делегациясы 2026-жылдын 12–18-октябрында Таиланддын Бангкок шаарында өткөн Эл аралык валюта фондунун жана Дүйнөлүк банк тобунун башкаруучуларынын жылдык жыйындарына катышты.

Жылдык жыйындардын алкагында Улуттук банктын делегациясы ЭВФтин Жакынкы Чыгыш жана Борбордук Азия департаменти тарабынан уюштурулган иш-чараларда болду.

Аталган иш-чараларга региондун борбордук банктарынын жетекчилери жана ЭВФтин аткаруучу директорунун орун басары Бо Ли да катышкан.

Мындан тышкары, делегация ЭВФтин жана Дүйнөлүк банктын Швейцариялык тобунун отурумуна катышты. Жолугушуулардын жүрүшүндө дүйнөлүк экономиканын өнүгүшү, глобалдык финансылык туруктуулук, ошондой эле ЭВФке жана Дүйнөлүк банкка мүчө мамлекеттер тарабынан жүргүзүлүп жаткан экономикалык саясаттын чаралары талкууланды.

Улуттук банктын өкүлдөрү ЭВФтин бир катар иш-чараларында баяндамачы катары чыгып, тышкы туруксуздуктун шартында Кыргызстандын экономикасына таасир эткен негизги тышкы факторлор жана глобалдык белгисиздик шартында Улуттук банк тарабынан көрүлүп жаткан чаралар тууралуу маалымат беришти. Өзгөчө көңүл баалардын туруктуулугуна жана финансылык туруктуулукка байланышкан маселелерге бурулду.

Жылдык жыйындардын алкагында КР Улуттук банкынын делегациясы ЭВФтин департаменттеринин жетекчилери менен эки тараптуу жолугушууларды өткөрдү. Анда Кыргызстандын экономикалык абалы, акча-кредит саясатынын чаралары жана ЭВФтин техникалык жардамынын алкагындагы актуалдуу маселелер талкууланды.

Ошондой эле Улуттук банктын өкүлдөрү чет өлкөлүк борбордук жана коммерциялык банктардын өкүлдөрү менен кызматташуунун ар кандай багыттары боюнча эки тараптуу жолугушууларды өткөрүштү.

Белгилей кетсек, Кыргыз Республикасы 1992-жылдан бери Эл аралык валюта фондунун мүчөсү болуп саналат. Ал эми 1993-жылдан тартып добуш берүү боюнча Швейцариялык топтун курамына кирет. Бул топтун катарын Азербайжан, Кыргызстан, Польша, Казакстан, Сербия, Тажикстан, Түркмөнстан, Өзбекстан, Швейцария жана Лихтенштейн толуктайт.

Булак: Zobolo масс-медиасы