Кыргызстанда жашы жете электерге энергетик саткандарга чоң айып пул салуу сунушталууда

Zobolo — Жогорку Кеңештин депутаты Эрулан Көкүлов жашы жете электерге энергетикалык суусундуктарды сатууга тыюу салып, аны бузгандарга ири өлчөмдө айып пул киргизүү боюнча мыйзам долбоорун коомдук талкууга чыгарды.

Мыйзам долбоорунун негизги талаптары:

• Жашын текшерүү: Соодагер кардардын 18 жашка чыкканынан күмөн санаса, анын өздүгүн тастыктаган документин талап кылууга милдеттүү. Документ көрсөтүлбөсө, суусундукту сатуудан баш тартууга тийиш.

• Интернет аркылуу сатуу: Онлайн буйрутмаларды жеткирип берүүчү адам да алуучунун жашын текшерүүгө милдеттүү. Жеткирип берип жатканда жашын текшербестен калтырып кетүүгө тыюу салынат.

• Соода автоматтары: Энергетикалык суусундуктарды автоматтар аркылуу сатууга толук жол берилбейт.

• Маалымат илүү: Дүкөндөр жана интернет-дүкөндөр 18 жашка чейинкилерге энергетик сатууга тыюу салынганы тууралуу эскертүүнү мамлекеттик жана расмий тилдерде көрүнүктүү жерге милдеттүү түрдө жайгаштырышы керек.

Сунушталып жаткан айып пулдардын өлчөмү:

• Эскертүү маалыматын жайгаштырбагандарга: жеке жактарга — 1 000 сом, юридикалык жактарга — 5 000 сом;

• Жашы жете электерге энергетик саткандарга: жеке жактарга — 10 000 сом, юридикалык жактарга — 35 000 сом;

• Бузуулар бир жыл ичинде кайталанса: жеке жактарга — 20 000 сом, юридикалык жактарга — 55 000 сом;

• Соода автоматтары аркылуу саткандарга: жеке жактарга — 10 000 сом, юридикалык жактарга — 35 000 сом.

Булак: Zobolo масс-медиасы