«Гангирбаш экениңди мойнуңа ал!»: Кыргызстандыктар Шакиранын экс-күйөөсүнүн баракчасына чабуул жасашты

Zobolo — Мурдагы «Барселона» футбол клубунун оюнчусу Жерар Пикенин социалдык тармактагы баракчасындагы соңку постторунун алдында дүйнөлүк жылдыз Шакираны кайрадан кызуу талкуулай башташты. Бул жолу сындарга кыргызстандык колдонуучулар да активдүү катышууда.

Белгилүү болгондой, 18-октябрда Шакира «Las Mujeres Ya No Lloran World Tour» дүйнөлүк турнесинин алкагында Бишкек шаарында чоң концерт берген эле. Социалдык тармактардагы пикирлерге караганда, кыргызстандыктар концертке абдан ыраазы болушкан. Көрүүчүлөр анын таланттуулугун, кесипкөйлүгүн жана харизмасын жогору баалап, ошондой эле жеке жашоосундагы кыйынчылыктарга карабай, ал миллиондогон адамдарды кантип шыктандырып жатканын жазышууда.

Мунун фонунда Instagram колдонуучулары Пикенин баракчасына кыргыз жана орус тилдеринде массалык түрдө пикир калтыра башташты. Айрымдары футболчуну өткөн жоругу үчүн дагы бир жолу айыпташса, башкалары Шакираны мактап, кээ бири тамашалуу комментарийлерди калтырууда. Алардын арасында Толкунай Мамытова аттуу колдонуучунун: "Шакираны кимге алмаштырганыңды билбейм, бирок "гангирбаш" экениңди мойнуңа ал!" — деп жазган комментарийи интернет колдонуучулардын өзгөчө көңүлүн буруп, кызуу талкуу жаратты.

Булак: Zobolo масс-медиасы