Садыр Жапаров «Мадина» базарына күтүүсүз барды

Zobolo — Президент Садыр Жапаров 20-октябрда жаңы «Мадина» базарына пландан тышкары барып, соодагерлер менен жолугушту. Алар ижара акысын төмөндөтүү жана соода орундарын сактап калуу маселелерин көтөрүштү.

Мамлекет башчысы жаңы базарды кыдырып, соода түйүндөрүнүн даярдыгы менен таанышты. Президенттин Иш башкаруучусу Каныбек Туманбаев объект өрт коопсуздугу жана санитардык талаптарга жооп берерин, учурда ачууга даярдык көрүлүп жатканын билдирди.

Соодагерлер өздөрүн түйшөлткөн маселелерди айтып, президентке кайрылууларына көңүл бурганы үчүн ыраазычылык билдиришти.

Андан соң Садыр Жапаров август айынын аягында өрт чыккан эски «Мадина» базарына да барды. Ал жерде жабыркаган соодагерлерге компенсация базар жайгашкан жер тилкесинин ээсинин эсебинен төлөнөрү белгилүү болду.

Ошондой эле айрым ишкерлер соода орундарын базардын мурдагы ээлеринен сатып алышканы айтылды. Мындай кайрылуулар укук коргоо органдарынын катышуусунда жекече каралат.

Базар администрациясынын маалыматына караганда, соодагерлердин 90 пайызга жакыны жаңы базарга көчүп барган.

Президент тиешелүү жетекчилерге базарды ачууга даярдыкты толук бүтүрүп, ишкерлер үчүн коопсуз жана ыңгайлуу шарттарды түзүүнү тапшырды. Жаңы «Мадина» базары ноябрь айынын башына чейин толук ишке даяр болуп, штаттык режимде иштеши керек.

Булак: Zobolo масс-медиасы