Садыр Жапаров Анкарадагы саммитте Ысык-Көлдү сактоо фондун түзүүнү демилгеледи

Zobolo — Президент Садыр Жапаров климаттын өзгөрүшүнө каршы биргелешкен чараларды күчөтүүнү сунуштап, Ысык-Көлдү сактоо боюнча атайын фонд түзүү демилгесин көтөрдү. Бул тууралуу ал Анкара шаарында өткөн Түрк мамлекеттер уюмуна (ТМУ) мүчө өлкөлөрдүн башчыларынын 13-саммитинде билдиргенин «Ынтымак ордо» кабарлады.

Мамлекет башчысынын айтымында, Кыргызстан 2027-жылы ТМУнун экология министрлеринин жолугушуусун өткөрүүгө даяр. Ошондой эле ал келерки жылы Бишкекте өтө турган «Бишкек+25» экинчи глобалдык тоо саммитине жана Түрк мамлекеттер уюмунун бейформал саммитине катышууга боордош өлкөлөрдүн лидерлерин чакырды.

Саммиттин жүрүшүндө экономикалык жана инвестициялык кызматташтыкка да кеңири орун берилди. Жапаров Ысык-Көлдөгү «Тамчы» атайын финансылык-инвестициялык аймагын инвестиция тартуучу маанилүү аянтча катары белгилеп, боордош мамлекеттердин ишкерлерин кызматташууга үндөдү.

Мындан сырткары, Кытай — Кыргызстан — Өзбекстан темир жолунун жана анын Каспий деңизи аркылуу Орто коридорго кошулушунун стратегиялык маанисине токтолду.

Президент туризм тармагы тууралуу да айтып, «Ала-Тоо Резорт» комплекси жылына 2 миллионго чейин турист кабыл алып, 5 миңдей кишини жумуш менен камсыздай турганын билдирди. Аталган долбоордун биринчи объекти 1-декабрда ачылат. Сөзүнүн соңунда өлкө башчысы жасалма интеллект, санариптештирүү, билим берүү жана маданият тармактарында чогуу иштешүүнү сунуштады.

Булак: Zobolo масс-медиасы