Садыр Жапаров ТүркПАга мүчө өлкөлөрдүн парламент спикерлерин кабыл алды

Бишкекте түрк мамлекеттеринин парламенттер аралык кызматташтыгын өнүктүрүүгө арналган жолугушуу өттү.

Zobolo — Президент Садыр Жапаров Түрк мамлекеттеринин Парламенттик ассамблеясына (ТүркПА) мүчө өлкөлөрдүн парламент спикерлерин кабыл алды. Бул тууралуу «Ынтымак ордо» маалымдады.

Жолугушуу Бишкек шаарында өтүп жаткан ТүркПА Кеңешинин 15-пленардык жыйынынын алкагында уюштурулду.

Мамлекет башчысы боордош мамлекеттердин ортосундагы достук жана өз ара ишеним мындай жолугушуулардын маанилүүлүгүн көрсөтөрүн белгиледи. Ошондой эле Кыргызстан ТүркПАнын алкагындагы кызматташтыкты мындан ары да өнүктүрүүгө кызыкдар экенин билдирди.

Садыр Жапаров ассамблеянын ишмердүүлүгү түрк мамлекеттеринин ортосундагы байланыштарды чыңдоого, соода-экономикалык, транспорттук, энергетикалык, санариптик жана гуманитардык тармактардагы кызматташтыкты тереңдетүүгө багытталганын айтты.

Өз кезегинде парламент спикерлери жылуу кабыл алуу үчүн президентке ыраазычылык билдирип, түрк дүйнөсүнүн биримдигин чыңдоодо Кыргызстандын маанилүү ролун белгилешти.

Ошондой эле алар парламенттер аралык кызматташтыкты өнүктүрүүдө, интеграциялык процесстерди колдоодо жана боордош мамлекеттердин ортосундагы байланыштарды кеңейтүүдө ТүркПАнын маанисине токтолушту.

Булак: Zobolo масс-медиасы