«MEGA» оператору жана ИИМ жарандарга маанилүү кайрылуу жасады

Zobolo — Ички иштер министрлиги жарандардын аккаунттарына жана жеке маалыматтарына жетүү максатында жасалып жаткан интернет-алдамчылык фактыларынын көбөйүп жаткандыгына байланыштуу коңгуроо кагып, эскертүү жасады.

Улуттук уюлдук байланыш оператору MEGAнын маалыматына ылайык, акыркы күндөрү алдамчылык аракеттеринин массалык түрдө көбөйгөн учурлары катталууда. Зыянкечтер өздөрүн уюлдук байланыш операторлорунун, банктардын жана башка мекемелердин кызматкерлери катары тааныштырып, шектүү билдирүүлөрдү жөнөтүү аркылуу колдонуучулардын аккаунттарына, анын ичинде популярдуу мессенджерлерге кирүү үчүн ырастоо коддорун алууга аракет кылышууда.

Ушуга байланыштуу ИИМ MEGA оператору менен биргеликте жарандарды санариптик коопсуздук эрежелерин сактоого чакырат. Аккаунтту коргоонун эң натыйжалуу жолдорунун бири — эки факторлуу аутентификацияны (кошумча PIN-код) иштетүү. Алдамчылар SMS-кодду билип алышса да, бул функция аккаунтка кирүүгө тоскоол боло алат.

Негизги коопсуздук эрежелери:

• Мессенджерлердин жөндөөлөрүнөн эки баскычтуу текшерүүнү (PIN-код) күйгүзүү (Мисалы, WhatsAppта: «Аккаунт» → «Эки баскычтуу текшерүү»).

• Ким өзүн тааныштырбасын (оператор, банк кызматкери), ырастоо коддорун, PIN-коддорду жана сыр сөздөрдү эч кимге бербөө.

• Шектүү шилтемелерге кирбөө жана белгисиз адамдардын өтүнүчү боюнча тиркемелерди орнотпоо.

• Таанышыңыз шашылыш түрдө акча сурап кайрылса, аны менен башка байланыш каражаты аркылуу сөзсүз тактаңыз.

Алдамчылар чукул арада аккаунтту бузуп кирип, сиздин байланыштарыңыздагы адамдарга карызга акча сурап жазышы мүмкүн экенин эске алыңыз. Сак болуңуз!

Булак: Zobolo масс-медиасы