Россиянын түрмөлөрүндө 1003 кыргызстандык жаза өтөп жатат

Zobolo — Россияда 1003 Кыргызстандын жараны эркинен ажыратуу жазасын өтөп жатат. Бул тууралуу Жогорку Кеңештин комитетинин жыйынында башкы прокурордун орун басары Үмүткан Конкубаева билдирди.

Анын маалыматына караганда, 2026-жылдын тогуз айынын жыйынтыгында чет өлкөлөрдүн түрмөлөрүндө жалпысынан 1319 кыргызстандык жаза өтөп жаткан. Алардын 1003ү Россияда, 109у Казакстанда, 55и Өзбекстанда жана 41и Иракта кармалууда.

Россияда соттолгон 1003 жарандын 289у жазасын Кыргызстанда өтөө үчүн экстрадициялоо маселеси боюнча кайрылган. Бирок алардын жарымы тиешелүү арыздан баш тарткан. Айрымдарына карата оор кылмыштар боюнча коюлган беренелер экстрадициялоого жол бербейт.

Конкубаеванын айтымында, соттолгон жаранды Кыргызстанга өткөрүп берүү үчүн анын жазуу жүзүндөгү макулдугу талап кылынат. Ошондой эле мыйзамда экстрадициядан баш тартууга негиз боло турган бир катар жагдайлар каралган.

Булак: Zobolo масс-медиасы