Абдыкадыр Орозбековдун сөөгү «Ала-Арчадабы?" Сөөк издөөгө уруксат сурашууда

Zobolo — Тарыхчы Кыяс Молдокасымов президент Садыр Жапаровго кайрылып, Бишкектеги «Ала-Арча» көрүстөнүндө кыргыз мамлекеттүүлүгүнүн негиздөөчүлөрүнүн бири Абдыкадыр Орозбековдун сөөгү жашырылган жерди казуу иштерин уюштурууга көмөктөшүүнү суранды.

Анын айтымында, сөөк коюлган ыктымалдуу тилке аныкталды, бирок издөө иштерин баштоо үчүн мамлекеттик органдардын уруксааты керек. Молдокасымов буга чейин Жусуп Абдрахманов менен Иманалы Айдарбековдун гана сөөктөрү табылып, «Ата-Бейитке» коюлганын эскертти. Калган үч ишмердин кайда жашырылганы ушул күнгө чейин белгисиз.

Тарыхчынын маалыматы боюнча, 1938-жылдын май айында Абдыкадыр Орозбеков репрессиянын башка курмандыктары менен бирге «Ала-Арча» көрүстөнүнө жашыруун көмүлгөн.

Сурамжылоолорду жүргүзүп, анын сөөгү жашырылган болжолдуу жерди аныктадык. Эми тактоо үчүн адистер менен биргеликте казуу иштерин жүргүзүү калууда, — деди ал.

Тарыхчы буга чейин да бийликке кайрылып, эки жылдан бери жооп албаганын белгилеп, президенттен тиешелүү тапшырмаларды тапшырууну өтүндү.

Айта кетсек, Абдыкадыр Орозбеков 1925–1937-жылдары жогорку мамлекеттик кызматтарды ээлеген. 1937-жылы камакка алынып, 1938-жылы камакта каза болгон, ал эми 1956-жылы акталган. 2024-жылы заманбап кыргыз мамлекеттүүлүгүнүн негиздөөчүлөрүнүн бири катары расмий таанылган.

Булак: Zobolo масс-медиасы