Борбор калаанын бирдиктүү дизайн-кодуна ылайык фасаддарды өзгөртүүгө тыюу салынды

Zobolo — Бишкек шаарынын бирдиктүү дизайн-кодунун талаптарын сактоо максатында мэрия тарабынан борбор калаанын негизги көчөлөрүндөгү имараттардын фасаддарын оңдоо иштери жүргүзүлдү.

Атап айтканда, төмөнкү даректердеги имараттардын тышкы көрүнүшү иретке келтирилди:

• Чүй проспектиси — Манас көчөсүнөн Ж. Абдрахманов көчөсүнө чейин;

• Жибек Жолу проспектиси — Манас көчөсүнөн Ж. Абдрахманов көчөсүнө чейин;

• Ч. Айтматов проспектиси — Жибек Жолу проспектисинен Семетей көчөсүнө чейин;

• Ж. Абдрахманов көчөсү — Жибек Жолу проспектисинен Семетей көчөсүнө чейин.

Бишкек шаарынын мэриясынын 2026-жылдын 13-октябрындагы № 353-т тескемесине ылайык, көрсөтүлгөн даректердеги имараттардын фасаддарын өз алдынча өзгөртүүгө катуу тыюу салынат. Мэрия бюджеттик каражаттардын эсебинен оңдолгон имараттардын менчик ээлерин жана пайдалануучуларын тышкы келбетти аяр сактоого чакырат.

Эмнелерге тыюу салынат?

• Фасаддардын түсүн, сырдоосун жана каптамасын өз алдынча алмаштырууга;

• Архитектуралык жана көлөмдүк-мейкиндик чечимдерин бузууга;

• Кире бериш топторун орнотууга, балкондорду айнектөөгө жана кайра жабдууга;

• Кондиционерлерди, көрнөктөрдү, маалыматтык жана жарнамалык конструкцияларды иретке каршы жайгаштырууга.

Шаардык аймактагы имараттардын фасаддарына өзгөртүүлөр Бишкек шаардык кеңешинин 2024-жылдын 14-майындагы № 134 токтому менен бекитилген талаптарга ылайык, белгиленген гана тартипте жүргүзүлүшү керек.

Ошондой эле Кыргыз Республикасынын Укук бузуулар жөнүндө кодексинин 107 жана 434-беренелерине ылайык, тышкы жарнаманы эреже бузуп жайгаштыргандыгы же мыйзамдуу талаптарды аткарбагандыгы үчүн жоопкерчилик каралганын мэрия эскертет. Имараттардын фасаддарын талаптарга келтирүү боюнча иштер улантылууда.

Булак: Zobolo масс-медиасы